கவிஞர் தாமரை அவர்களுக்கு, பல கோடி வணக்கங்கள்! நீங்கள் நலமாகவும், வளமாகவும் தமிழகத்தில் நீண்ட காலம் வாழ வேண்டும் என்று பிரார்த்திக்கும் ஈழத் தமிழர்களில் ஒருத்தியான நான் உங்கள் உள்நாட்டு அரசியல் களத்திற்குள் எங்களை வலிந்து இழுத்து மீண்டும் ஒரு கொலைக் களத்தில் நிறுத்திவாடாதீர்கள் என்று மன்றாட்டமாகக் கேட்டுக் கொள்ளுகின்றேன்.
நீங்கள் ஜெயலலிதாவை நிராகரிப்பதும், கருணாநிதியை ஏற்றுக் கொள்வதும் உங்களது தெரிவாக இருப்பது போலவே, ஐயா பழ. நெடுமாறன், வைகோ, சீமான் போன்ற தமிழுணர்வாளர்கள் தமிழக முதல்வர் கருணாநிதி மீண்டும் ஆட்சிக்கு வருவது கேடு என்று தீர்மானிப்பதும் அவர்கள் தெரிவாக இருப்பதை நீங்கள் நிராகரிப்பதும், அதற்காக வலிந்து தமிழீழ மக்களை உள்ளிழுப்பதும் நியாயமான உணர்வாகத் தோன்றவில்லை.
தமிழக சட்டசபைக்காக நடைபெற உள்ள தேர்தலிலும் தமிழீழ மக்கள் அதைத்தான் எதிர்பார்த்திருக்கிறார்கள். புலம்பெயர் தமிழ் மக்களும் அதையே அவாவி நிற்கிறார்கள்.
தானாக எழுந்திருக்க வேண்டிய தமிழகத்தை முத்துக்குமாரன் தன்னை எரித்துத் தட்டி எழுப்பினான், ஆனாலும் தமிழகத்தை மீண்டும் உறங்கத் தாலாட்டுப் பாடிய தமிழக முதல்வர் குறித்து நீங்கள் பாராட்டுரை வழங்க முற்பட்டது மிகவும் பரிதாபத்திற்குரியது. எப்படி முடிந்தது, இறுதி நாட்களில் மட்டும் முப்பதாயிரம் தமிழர்கள் சிங்களத்தால் படுகொலை செய்யப்பட்ட போது, பார்த்துக்கொண்டு வாழாதிருக்க உங்கள் தலைவரால் எப்படி முடிந்தது. கலைஞர் கருணாநிதி அல்லாமல், வேறு எந்தத் தமிழனாவது அந்த ஆட்சிக் கதிரையில் அமர்ந்திருந்தால் எங்கள் சேதங்களில் பாதியாவது குறைந்திருக்கும் என்பது தமிழ் உணர்வாளரான உங்களுக்குப் புரியாதது விந்தையாக உள்ளதே.
நடந்து முடிந்த நாடாளுமன்றத் தேர்தலில் வெற்றி பெறுவதற்காக கலைஞர் நடாத்தி முடித்த நாடகத்தால் தமிழகத்தில் தடுமாற்றம் உருவானது உண்மையே. தமிழின உணர்வு தமிழகத்தில் மழுங்கடிக்கப்பட்டதனால், கலைஞர் கரம் மீண்டும் டெல்லியில் பலம் பெற்றது. அதற்கு. மத்தியில் ஒரு ஸ்திரமான ஆட்சி வேண்டும் என்று தமிழக மக்கள் நினைத்ததும் ஒரு காரணமாக அமைந்துவிட்டது. ஆனால், நடைபெறவுள்ள சட்ட மன்றத் தேர்தல் கலைஞர் கருணாநிதி அவர்களது வரலாற்றுத் தவறுக்குத் தமிழர்களால் தண்டனை வழங்க வேண்டிய தேர்தல் என்றே உலகத் தமிழர்கள் அனைவரும் கருதுகின்றார்கள். நாங்களும் அந்த உடன்பாட்டில்தான் இருக்கின்றோம்.
நம் தமிழினத்தை அழித்து, மென்று, உமிழ்நீரால் ஊறவைத்த காங்கிரஸ் கட்சியைத் தமிழ்நாட்டில் இருந்து ஒழிக்க வேண்டும் என்று நீங்கள் சொல்வது நூற்றுக்கு நூறு சரி என்று இயக்குனர் சீமான் அவாகளுக்கு ஒப்புதல் வாக்குமூலம் அழித்த நீங்கள் தமிழீழ மக்களுக்கு என்ன தீர்வை வழங்க எண்ணுகின்றீர்கள்? காங்கிரஸ் தோற்கடிக்கப்பட்ட, தி.மு.க. ஆட்சிக்கு வந்தாலும் அவர்கள் காவடி டெல்லியை நோக்கித்தானே இருக்கும். இன்னொரு ஸ்பெக்ரம் அரங்கத்திற்கு வராமல் தடுப்பதற்கு எங்கள் ஈழத்தில் இன்னொரு முள்ளிவாய்க்கால் கொடூரம் அரங்கேற்ற கலைஞர் அங்கீகாரம் கொடுக்கமாட்டார் என்று சொல்ல வருகின்றீர்களா?
யார் இந்த ஜெயலலிதா? என்று பட்டியலிடுகின்றீர்களே… அவரிடம் ஈழத் தமிழர்கள் எதையும் யாசிக்கவில்லையே… எதையும் எதிர்பார்த்திருக்கவில்லையே… ‘போர் என்றால் மக்கள் சாகத்தான் செய்வார்கள்’ என்று அவர் சொல்லிய பின்னர்தானே, ‘சகோதர யுத்தத்தால் தமிழீழம் அழிந்தது’ என்று கலைஞர் எரிந்து கொண்டிருந்த தமிழீழ மக்கள் மீது எண்ணை வீசினார். அதை எப்படி விட்டுவிட்டீர்கள். நாங்கள் செல்வி ஜெயலலிதாவுக்கு வக்காலத்து வாங்கவில்லை. தேசத்தின் குரல் அன்ரன் பாலசிங்கம் அவர்கள் நோயைக் காரணம் காட்டி, இந்தியாவில் சிகிச்சைக்காக அனுமதி கேட்டது இந்தியாவின் கொடூர சிந்தனையைத் தணிப்பதற்காக என்ற எங்களுக்குத் தெரிந்த உண்மை உங்களுக்குத் தெரியாமல் போய்விட்டதே. வைகோ, நெடுமாறன் உள்ளிட்ட ஈழ ஆதரவுத் தலைவர்களை ஜெயலிலலிதா பொடாவில்தான் அடைத்தார், தமிழீழத்தின் மனச்சாட்சி சீமானை தமிழகத்து முதல்வர் கருணாநிதி தேசத்துரோகக் குற்றச்சாட்டில் அல்லவா சிறையில் அடைத்தார்.
தமிழீழம் எரிந்தபோதும், தமிழர்கள் கொன்று குவிக்கப்பட்டபோதும் தமிழக முதல்வர் வாளேந்தியவாறு போர்க் களத்துக்கா வந்தார்? மக்கள் படையைத் திரட்டிக்கொண்டு கடல் கடக்கவா முயற்சித்தார்? வெற்றுக் காகிதத்தில் கொட்டை எழுத்துக்களில் கடிதம் மட்டும்தானே வரைந்து கொண்டிருந்தார்? முத்துக்குமாரன் மூட்டிய தமிழின எழுச்சியை மூன்று மணி நேர உண்ணாவிரதத்துடன் முடிவுக்குக் கொண்டுவந்த சாகசத்தையல்லவா அரங்கேற்றி, இந்தியாவின் தலைவிதி சோனியாவின் வியூகத்திற்கும், ராஜபக்ஷவின் வேட்டைக்கும் பங்கம் வந்துவிடாமல் பார்த்துக்கொண்டாரே, அதைவிட ஒரு தமிழினத் துரோகத்தை ஜெயலலிதாவினாலும் புரிய முடிந்திருக்காதே.
சிறிலங்கா அதிபர் தேர்தலில் தமிழீழ மக்கள் எடுத்த அதே ஆயுதத்தைத்தான் சீமான் அவர்களும் எடுத்துள்ளார். தமிழீழத்தில் மனிதப் பேரழிவு நடைபெறுவதற்கு முன்பாக ஜெயலலிதா பேசியதும், செய்ததும் இப்போது மாற்றம் பெற்றிருக்கலாம் என்று நம்புவதற்கு சில காரணங்களாவது இருக்கலாம். ஆனால், முள்ளிவாய்க்காலின் இத்தனை கொடூரங்களுக்கும் உடன் இருந்து இறுதிக்கிரியை மட்டும் எங்கள் எதிரிகளுடன் கைகோர்த்து நின்ற கலைஞர் அதன் பின்னரும் மாறாத தமிழினத் துரோகத்துடனேயே பயணிக்கிறார் என்பதைத் தெரிந்து கொண்டும் அவரைக் காப்பாற்ற முயற்சி செய்யும் உங்கள் தமிழுணர்வைப் பாராட்டாமல் இருக்க முடியாது.
கட்சிகளாலும், சாதிகளாலும், மதங்களாலும் பிளக்கப்பட்டுள்ள தமிழக மக்கள் மனங்களில் தமிழுணர்வைப் புகுத்தி அணி சேர்ப்பது என்பது சாத்தியமான செயற்பாடாக என்னால் கருத முடியவில்லை. இலவசங்களால் அபகரிக்கப்பட்ட மக்கள் மனங்களை இலகுவாகத் திருப்பிவிட முடியாது. அதற்கு, ஒரு மாற்று அரசியல் சக்தியின் ஆதரவு அவசியம். முதலில், எல்லோரும் ஒன்றிணைந்து துரோகிகளைத் தோற்கடியுங்கள். எதிரிகள் தன்னாலேயே காணாமல் போய்விடுவார்கள். அவர்களில் ஒருவர்தானே ஆட்சிக்கு வருவார் என்று பேசாமல் இருந்தால், தமிழகத்தின் எதிர்காலமும், அதனுடன் சேர்ந்து தமிழினத்தின் எதிர்காலமும் தொலைந்தே போய்விடும்.
இலங்கைப் புறக்கணிப்பை வலுவாக மேற்கொள்வோம் என்ற எங்கள் மீதான உங்கள் அக்கறைக்கு தமிழீழம் என்றும் தலை வணங்கும். நாடுகடந்த தமிழீழ அரசாங்கத்தின் செயல்பாடுகளைத் தமிழகத்தில் கொண்டு வருவோம் என்ற உங்கள் கருத்துக்கு புலம்பெயர் தமிழீழ மக்கள் சார்பாக உங்களிடம் ஒரு வேண்டுகோளையும் விடுக்க விரும்புகின்றேன். ‘நாடு கடந்த தமிழீழ அரசாங்கம்’ என்ற அற்புதமான கருப் பொருள் தமிழீழத்தை வென்றெடுக்கும் கருவியாக மட்டுமே பயன்பட வேண்டும். புலம்பெயர் தமிழினம் அதன் பின்னெ அணி திரளும் நிலை உருவாக்கப்பட வேண்டும். தற்போது, புலம்பெயர் தமிழ் மக்களைப் புது அணிகளாகப் பிளவு படுத்த முயலும் மூன்றாம்தர அரசியலிலிருந்து அதன் பிரதமர் முற்றாக விடுபட்டு, புலம்பெயர் தமிழர்களின் அத்தனை அமைப்புக்களையும் உள்வாங்கி, அதனூடான தமிழ்த் தேசிய அணியாக நாடு கடந்த தமிழீழ அரசாங்கம் பலம் பெற வேண்டும் என்ற புலம்பெயர் தமிழாகளின் விருப்பங்களை நிபந்தனையாக வைத்தே உங்கள் ஆதரவினைத் தெரிவியுங்கள் என்ற வேண்டுகோளையும் உங்களுக்கு விடுக்கின்றேன்.
‘நாடற்ற உலகத் தமிழருக்கான நாடான, தமிழீழத்தில் நாளை சந்திப்போம்!’
Comments