காங்கிரஸிற்கு இணக்கமான தீர்மானம்!

இலங்கைத் தமிழர்கள் பிரச்சனையில் ஆளும் தி.மு.க. கட்சியின் செயற்குழு இன்று நிறைவேற்றிய தீர்மானம், இலங்கைத் தமிழர்களின் நலனைக் காப்பாற்றுவதில் செலுத்தும் அக்கறையை விட, மன்மோகன் சிங் அரசிற்கு எந்த நெருக்கடியையும் கொடுக்கக் கூடாது என்பதிலும், ஒரு சிறு காரணத்திற்காகக் கூட காங்கிரஸை விரோதித்திக் கொண்டு ஆட்சியை இழந்துவிடக் கூடாது என்பதிலும் அதிக அக்கறை உள்ளதை அற்புதமாக பறைசாற்றியுள்ளது.

தங்களது நிலைப்பாட்டில் ஏற்பட்டுள்ள ‘தலை கீழ் மாற்றத்தை மறைக்க’ தி.மு.க. தலைவரும், தமிழகத்தின் முதலமைச்சருமான கருணாநிதி காட்டியுள்ள ‘அரசியல் சாதுரியம்’ தமிழர்களின் வரலாற்றில் நீங்காத கறையாக என்றென்றும் நிலைத்திருக்கும்.

இலங்கைத் தமிழர்கள் மீது சிறிலங்க அரசின் இராணுவமும், விமானப் படையும் கடந்த பல மாதங்களாக தொடர்ந்து நடத்திவரும் தாக்குதலை நிறுத்த, தமிழக சட்டப்பேரவையில் கடந்த மாதம் 23ஆம் தேதியன்று ‘அய்யகோ தமிழினம் அழிகிறதே’ என்று கூறித் துவங்கும் தீர்மானத்தினை முன்மொழிந்து பேசிய முதலமைச்சர் கருணாநிதி, இன்றே போர் நிறுத்தம் செய்யப்பட வேண்டும் என்று கூறினார்.

அதுமட்டுமல்ல, போர் நிறுத்தம் செய்து, அதன் பிறகு அமைதிப் பேச்சுவார்த்தை நடத்தி இனப் பிரச்சனைக்கு ஒரு தீர்வு காண மத்திய அரசு முயற்சிக்க வேண்டும் என்று பேசினார். அன்று நிறைவேற்றப்பட்டத் தீர்மானத்தின் முக்கிய பகுதி இதுதான்:

“இலங்கையில் தமிழ் இனமே அழிந்து கொண்டிருக்கிறது. ஐ.நா. மன்றம் கண்டனம் தெரிவிக்கிற அளவுக்கு; அந்த நாடு அப்பாவித் தமிழ் மக்களின் இடுகாடாக- சுடுகாடாக- ஆகிக் கொண்டிருக்கிறது. குழந்தை குட்டிகளோடு, குடும்பம் குடும்பமாக குய்யோ முறையோ என்ற கூச்சலும்- ஒப்பாரியும் புலம்பலும்- பின்னணியாக, பிணங்கள் குவிக்கப்படுகின்றன. அத்தனையும் தமிழ் மக்களின் பிணங்கள்.

அய்யோ! அந்த சிங்கள ராணுவ குண்டு வீச்சுக்கிடையே- சிதறியோடும்- சிறுவர், சிறுமியர்- சிலராவது செத்துப் பிழைத்தார்கள் என்ற செய்தியும் கூட அறவே அற்றுப் போய்- இன்று கூண்டோடு சாகின்றனரே- பூண்டோடு அழிகின்றனரே- மனித நேயமற்ற மாபாவிகளின் சேட்டையால்; இத்தனை ஆண்டுகள்; இழித்தும்- பழித்தும்- இறுதியாக அழித்தும் ஒழிக்கப்படுகிறதே உலகை ஆண்ட ஓர் இனம்- அந்த இனத்தை இறுதியாக இலங்கையில் விடப்பட்டுள்ள இந்த அறைகூவலில் இருந்து எப்படி மீட்கப்போகிறோம்?

இறுதி வேண்டுகோளாக இந்தியாவில் உள்ள தமிழ்நாடு என்ற மாநிலத்தில் நாம் வாழுகிறோம் என்பதால் நம்மை அரவணைத்துக் காத்திடும் பொறுப்பை இந்தியப் பேரரசு பார்த்துக் கொள்ளும்- ஆம், பார்த்துக் கொள்ள வேண்டும் என்ற உரிமையோடு எதிர்பார்க்கிறோம். நமக்கு பாதுகாப்பு தருவதாயினும்- பாதிப்பைக் களைவதாயினும் இரண்டையும் சீர்தூக்கி செயல்படுத்தி, இந்த மாநில மக்களுக்கும்- இந்த மாநில மக்களாம் தமிழ்க்குடி மக்களின் நலத்திற்கும் நமது தொப்புள் கொடி உறவு கொண்ட இலங்கைத் தமிழ் மக்களின் நலத்திற்கும் உத்திரவாதமளிக்கக் கூடிய பொறுப்பு;- உலகில் எங்கு இனப் படுகொலை நடந்தாலும் தட்டிக் கேட்கும் உணர்வும், உரிமையும் கொண்ட இந்த பெரிய ஜனநாயக நாடாம் இந்தியத் திருநாட்டில் மக்களாட்சியை நடத்துகிற மத்திய ஆட்சியின் கரங்களில் இருக்கும்போது; நாம் அந்த கரங்களைப் பிடித்துக் கொண்டு தானே; இலங்கையில் சீரழியும் - செத்து மடியும் எங்கள் தமிழ்ச் சாதியைக் காப்பாற்றுக என்று கண்ணீர் மல்கக் கேட்கிறோம்.

கேட்டுக் கேட்டுப் பயன் விளையாமற் போனதால்- இறுதி வேண்டுகோளாக முறையிடுகிறோம்; உடனடியாக இலங்கையில் போர் நிறுத்தம் செய்து; அந்தப் புத்தர் உலவிய பூமியில் அமைதிப் பூ மலர்ந்திட- ஆவன செய்திடுக என்று.

இந்த இறுதி வேண்டுகோள் புறக்கணிக்கப்படாமல் - இன்றே போர் நிறுத்தம் இலங்கையில்- அடுத்து அரசியல் தீர்வு- தொடர்ந்து அமைதி. எனவே அந்த நல்ல விளைவை எதிர்பார்த்து; இந்த மாமன்றத்தில் இலங்கைத் தமிழர் பிரச்சினை குறித்த இறுதித் தீர்மானமாக இதனை நான் முன்மொழிகிறேன்.”

FILE

ஆக, மேற்கண்டத் தீர்மானத்தின் முக்கிய குறிக்கோள் இலங்கையில் போர் நிறுத்தம் செய்யப்பட வேண்டும் என்பதுதான். அ‌ந்த தீர்மானத்தை முன்மொழிந்து ஆற்றிய உரையில் முதலமைச்சரே, “இலங்கையில் நடைபெறுகின்ற போர் நிறுத்தப்பட வேண்டும் என்பதுதான் நம்முடைய கோரிக்கையினுடைய முக்கியமான குறிக்கோள்” என்று கூறியுள்ளார்.

முதலில் போர் நிறுத்தம், பிறகு அமைதிப் பேச்சுவார்த்தை.

அதில் கூட எவ்வளவு தெளிவாக முதலமைச்சர் பேசினார் என்பதை அவரது உரையின் மற்றொரு பகுதி தெளிவாக்குகிறது: “இந்தியா இன்று பலவீனமாக உள்ளது. அது வெளிநாட்டில் வாழும் தனது மக்களுக்கு பெரிதாக எதுவும் செய்ய முடியாத நிலையில் உள்ளது. ஆனால் இந்தியா அவர்களையும் அவர்களுக்கு ஏற்படும் துயரத்தையும் இழிவையும் மறப்பதில்லை. ஒரு நாள் வரும் - அன்றைக்கு இந்தியாவின் பாதுகாப்பு கரம் நீளும் - அதன் வலிமையினால் அவர்களுக்கு நீதி கிடைக்கும்'' என்று நேரு 1939ஆம் ஆண்டு சொன்னதைத் தான் இப்போது நான் வலியுறுத்துகிறேன்.

இந்தியாவின் பாதுகாப்புக் கரம் நீளும் என்று அந்த மாபெரும் தலைவரின் உரையைக் சுட்டிக்காட்டி, இலங்கைத் தமிழர்களைக் காப்பாற்ற மத்திய அரசின் கரம் நீள வேண்டும் என்று வலியுறுத்திப் பேசிய முதலமைச்சரின் தலைமையில் இன்று நடந்த செயற்க்குழுக் கூட்டத்தில் நிறைவேற்றப்பட்ட தீர்மானத்தில் அந்த அழுத்தமும் இல்லை, ஆக்ரோஷமும் இல்லை, போர் நிறுத்தம் பற்றிய பேச்சும் இல்லை.

“இலங்கைத் தமிழர்களுக்கு வாழ்வுரிமை பெற்றுத் தரவும், அங்கு போர் நிறுத்தம் ஏற்பட்டு அமைதி ஏற்படவும், ஜனநாயக முறையில் அந்த நாட்டில் ஒரு தீர்வு காணவும் இலங்கைத் தமிழர் நல உரிமைப் பேரவை என்ற பெயரால் தமிழ்நாட்டின் பட்டி தொட்டியெங்கும் மக்களைத் திரட்டி அறப்போராட்டங்கள் நடத்தப்படும்” என்று அந்தத் தீர்மானம் பேசுகிறது.

இலங்கைத் தமிழர்களுக்கு வாழ்வுரிமை, அமைதி ஆகியவற்றை ஜனநாயக ரீதியில் அந்த நாட்டில் பெற்றுத் தர இயலாத நிலையில்தானே அங்கு போராட்டமும், அதற்கு ஆதரவாக இங்கு அரசியல், மக்கள் இயக்கங்களும் இதுநாள் வரை நடந்து வருகிறதே. பிறகு புதிதாக எதற்கு இன்னொரு அமைப்பு? எதற்கு மீண்டும் பேரணி, மாநாடு மனித சங்கிலி என்று போராட்டங்கள்? எல்லாவற்றையும் முதலில் இருந்தே துவக்குவோம் என்று கூறுகிறாரா தமிழக முதலமைச்சர்?

FILE

நீங்கள் வற்புறுத்திக் கேட்ட போர் நிறுத்தம் எங்கே, ஏன் ஏற்படவில்லை. அந்த கோரிக்கையைப் பற்றி இலங்கை சென்ற அயலுறவு அமைச்சர் பிரணாப் முகர்ஜி ஏன் பேசவில்லை? அதற்கு என்ன விளக்கம் என்று மத்திய அரசிற்கு கேள்வி எழுப்பாமல். “அந்தப் பயணம் அவருக்கே திருப்தியளிப்பதாக எனக்குத் தெரியவில்லை” என்று செய்தியாளர்களுக்கு அளித்த பேட்டியில் கூறுகிறார்.

திருப்தி இல்லையென்றா பிரணாப் முகர்ஜி கூறினார்?

“I had detailed, useful and productive discussions with H.E. President Rajapaksa and am pleased with the comprehensive briefing by the Sri Lankan side. We covered recent developments in Sri Lanka, the entire gamut of India-Sri Lanka relations and regional issues of mutual interest. India-Sri Lanka relations are developing strongly. It is particularly important at this time of transition and change that we should continue to strengthen our ties” என்று கூறி பிரணாப் முகர்ஜி விடுத்த அறிக்கையை இந்திய அயலுறவு அமைச்சகம் வெளியிட்டதே. அது எல்லா ஊடகங்களிலும் சொல்லப்பட்டதே?

FILE

“இலங்கையில் ஏற்பட்டுவரும் சமீபகால சம்பவங்கள் குறித்து மேதகு அதிபர் ராஜபக்ச அளித்த விளக்கம் எனக்கு மகிழ்ச்சியைத் தந்தது” என்றும், “உருமாற்றம், மாற்றமும் ஏற்பட்டு வரும் இந்தச் சூழலில் நாம் நமது உறவுகளை பலப்படுத்திக் கொள்வது முக்கியம்” என்றும் பிரணாப் கூறியது தமிழக முதலமைச்சருக்குத் தெரியாதா? அல்லது தெரிவிக்கப்படவில்லையா?

அயலுறவு அமைச்சர் பிரணாப் முகர்ஜி அந்த அறிக்கையில் கூறியுள்ள வார்த்தைகளின் பொருள் என்னவென்று முதலமைச்சர் கேட்டு அறிந்துள்ளாரா? அதனைத் தமிழ்நாட்டு மக்களுக்குத் தெரிவிப்பாரா?

இந்த வார்த்தைகளில் புதைந்துள்ளது இந்தியாவின் ‘நலன்’ மட்டுமல்ல, ஈழத் தமிழர்களின் நியாயமும்தான் என்பதை அறியாதவரா தமிழக முதல்வர்? தெரிந்தும் அதனை தமிழக மக்களுக்கு விளக்காமல் விடுவது நியாயம்தானா?

போர் நிறுத்தத்தை மட்டும் கைவிடவில்லை, பிரச்சனைக்கான தீர்வு குறித்து கொண்டிருந்த பாதையையும் மிக ‘லாவகமாக’ மாற்றிக் கொள்கிறார் தி.மு.க. தலைவர்.

“இலங்கையில் தமிழர்கள் வாழும் வடக்கு மற்றும் கிழக்குப் பகுதிகளில் முழுமையான அதிகார பகிர்வும், சுயாட்சியும் கிடைக்கின்ற அளவிற்கு, நிரந்தர அரசியல் தீர்வு ஒன்றிணை குறிப்பிட்ட கால வரையறைக்குள் உருவாக்கிச் செயல்படுத்திட, இந்திய அரசு உடனடியாக நடவடிக்கை எடுக்க வேண்டும் என்றும், அதற்கு இலங்கை அரசு முழுமையாக ஒத்துழைப்பு அளிக்க வேண்டும் என்றும் இந்த செயற்குழு நிறைவேற்றியுள்ள தீர்மானத்தை..” என்று கூறி, தங்களுடைய வாழ்வுரிமைப் பிரச்சனையில் அவர்களின் பிரதிநிதித்துவம் இல்லாமலேயே ஒரு தீர்வைத் திணித்திடும் இந்திய-சிறிலங்க அரசுகளின் திட்டத்திற்கு தமிழக முதல்வர் ஒப்புதல் அளித்துள்ளார்.

இது நியாயம்தானா? நியாயம்தான் என்றால், “அங்கு போர் நிறுத்தம் ஏற்பட்டு, அமைதிப் பேச்சுவார்த்தை துவக்கப்பட வேண்டும், அநதப் பேச்சுவார்த்தையின் மூலம் அமைதித் தீர்வு ஏற்பட வேண்டும், இங்கிருந்து கொண்டு எந்தத் தீர்வையும் நாம் திணிக்ககூடாது” என்று பேசியது ஏன்? எதனால் இந்த தடுமாற்றம்?

பிரணாப் முகர்ஜி தனது அறிக்கையில் கூறியிருந்தாரே அந்த ‘உருமாற்றம் மற்றும் மாற்றம்’ என்பன உங்கள் தீர்மானத்தில், உங்களுடைய குரலில் எதிரொலிக்கிறதா?

தமிழக மக்கள் சிந்திக்கின்றார்கள் முதல்வரே, மிகவும் ஆழமாக சிந்திக்கிறார்கள். உலகத் தமிழர்களும் நன்கு தெளிவாக பார்வையைக் கொண்டுள்ளார்கள். இதற்குமேல் யாரையும் ஏமாற்ற முடியாது.

FILE

இலங்கையில் துவங்கிய தமிழினப் படுகொலையைத் தொடர்ந்து அதற்கு எதிராக தமிழகத்தில் எழுந்த எழுச்சியை அரசியல் ரீதியாக பயன்படுத்திக் கொள்ளவே டெசோ அமைப்பை பயன்படுத்தினீர்கள். மதுரையில் நடந்த டெசோ மாநாட்டில் 20 ல‌ட்ச‌ம் பேர் திரண்டார்கள். அன்று மாநாட்டில் இறுதியுரை ஆற்றிய நீங்கள், எவ்வித போராட்டத்தையும் அறிவிக்காமல் அப்படியே கலைத்தீர்கள். அதனால் டெசோ அமைப்பு கலைக்கப்பட்டது.

இன்றும், இனப் படுகொலைக்கு ஆளாக்கப்படும் தங்கள் தொப்புள் கொடி உறவுகளைக் காக்க தமிழகத்தில் மிகப் பெரிய எழுச்சி உருவாகியுள்ளது. அது போர் நிறுத்தத்தை வலியுறுத்தி தமிழர்களை காக்கும் நோக்கு கொண்டது என்பது எல்லோரும் அறிந்தது. ஆனால் அது உங்களின் ஆட்சியைக் கலைக்கும் எழுச்சி என்று திசை திருப்புகிறீர்கள்.

இரண்டாவது முறையாக தமிழர்கள் ஏமாற மாட்டார்கள். ஏனெனில் இது அரசியல் அல்ல, ஈழத் தமிழர்களின் வாழ்‌க்கைப் பிரச்சனை. தமிழினம் விழிப்புடனேயே இருக்கும்.

---