முல்லைத்தீவு மாவட்டத்தில் உள்ள புதுக்குடியிருப்பு பகுதியில் உள்ள பாதுகாப்பு வலயத்தின் மீது சிறிலங்காவின் வான்படையின் வானூர்திகள் இன்று நடத்திய குண்டுத் தாக்குதல்களில் 32 தமிழர்கள் படுகொலை செய்யப்பட்டுள்ளதுடன் 48 பேர் படுகாயமடைந்துள்ளனர்.
பாதுகாப்பு வலய பகுதி மீது இன்று ஞாயிற்றுக்கிழமை காலை 7:00 மணிக்கும் பின்னர் 10:15 நிமிடத்துக்கும் மீண்டும் 11:00 மணிக்கும் சிறிலங்கா வான்படையினர் குண்டுத் தாக்குதல்களை நடத்தினர்.
முற்பகல் 11:00 மணிவரை சிறிலங்கா வான்படை 38 குண்டுகளை வீசியுள்ளது. மிக், கிபீர் மற்றும் எஃப்-7 ரக வானூர்திகள் மாறி, மாறி வந்து குண்டுத் தாக்குதல்களை நடத்தியுள்ளன.
இத்தாக்குதல்களில் 32 தமிழர்கள் படுகொலை செய்யப்பட்டுள்ளதுடன் 48-க்கும் அதிகமானோர் படுகாயமடைந்துள்ளனர். பெருமளவிலான மக்களின் கூடாரங்கள் முற்றாக எரிந்து நாசமாகியுள்ளன.
மக்கள் வாழ்விடங்கள் மீது சிறிலங்கா வான்படை தொடர்ச்சியாக குண்டுகளை வீசி வருவதால் மக்கள் பேரவலத்துக்குள் தள்ளப்பட்டுள்ளனர் என புதினத்தின் வன்னிச் செய்தியாளர் தெரிவிக்கின்றார்.
Comments