கிழக்கின் கடும் மழைப் பொழிவு தென் தமிழீழ மக்களையே பெரிதும் பாதித்திருந்தாலும், அழிவுகளே வாழ்க்கையாகிப்போன தமிழர்களை விடவும், ஆட்சியில் தொடர விரும்பும் ராஜபக்ஷ குடும்பத்தினருக்கு இது பெரும் பின்னடைவை ஏற்படுத்தியிருக்கும் என்பதில் ஐயம் இல்லை. சிங்கள மயப்படுத்தப்பட்ட கிழக்கின் இஸ்லாமிய கட்சிகளின் ஆதரவும் மகிந்த அரசுக்குக் கிடைத்துள்ள போதும், கருணா என்ற முரளீதரனை அமைச்சராகவும், பிள்ளையானை முதலமைச்சராகவும் உருவாக்கி வைத்திருக்கும் ராஜபக்ஷ ஆட்சியாளாகளுக்கு கிழக்கின் அவலங்களில் பங்கு கொண்டே ஆக வேண்டிய அவசியமும் உள்ளது. உலக நாடுகளின் கேள்விகளுக்கு சாதகமான பதிலைக் கொடுப்பதற்கு கிழக்கின் அமைதி ராஜபகஷக்களுக்குத் தேவையானதாக உள்ளதால், தென் தமிழீழத்திற்காக அவர்கள் முதலைக் கண்ணீராவது வடித்தே ஆகவேண்டும்.
போர்க் குற்ற விசாரணைக்கான சர்வதேச நெருக்குதல்களை எதிர்கொண்டுள்ள மகிந்த ராஜபகஷவால் இந்தியா ஊடான அழுத்தங்களுடன் தமிழ்த் தேசியக் கூட்டமைப்பை பேச்சுவார்த்தை நாடக அரங்கத்திற்குள் கொண்டுவர முடிந்துள்ள போதிலும், புலம்பெயர் தமிழர்களின் தொடர் போராட்டம் பெரும் கலக்கத்தை ஏற்படுத்தியுள்ளது. சிங்களக் கரங்களுக்குள்ள சிறை செய்ய முடியாத தொலை தூரங்களில், மேற்குலகின் ஜனநாயக பாதுகாப்பு அரண்களுக்குள் நின்றவாறு புலம்பெயர் தமிழர்கள் தொடுத்துவரும் சிங்கள தேசத்திற்குத் தொடர் அச்சுறுத்தலாகவே உள்ளது.
புலம்பெயர் தமிழர்களை விடுதலைப் புலிகளது செல்வாக்கு வளையத்திலிருந்து வெளியே கொண்டுவந்து, போர்க் குணமற்றதொரு ஜனநாயக கட்டமைப்பிற்குள் சிறைப்படுத்தும் ‘கே.பி.’ மூலமான சிங்கள அரசின் பொறி முறையும் புலம்பெயர் தமிழர்களிடம் குறிப்பிடத்தக்க செல்வாக்கைப் பெற முடியவில்லை. தேசியத் தலைவர் குறித்த செய்திகள், விடுதலைப் புலிகள் மீதான குற்றச்சாட்டுக்கள், அவதூறுகள் என்ற சிங்கள தேசத்தின் தொடர் உளவியல் போரும் புலம்பெயர் தமிழர்களால் தோற்கடிக்கப்பட்டுள்ளது. கடந்த மாவீரர் தினம் புலம்பெயர் தமிழர்களது ‘தமிழீழ விடுதலை’ குறித்த உறுதிப்பாட்டை மீண்டும் பதிவு செய்துள்ளது.
பிரான்ஸ் தமிழர்கள் மத்தியில் சிங்கள தேசத்தால் உருவாக்க முயன்ற பிளவு படுத்தல் முயற்சிகள் தகர்ந்துபோன நிலையில், ஒன்றிணைந்த பிரமாண்டமான போராட்டங்கள் மீண்டும் துளிர்த்து வருவது சிங்கள தேசத்தின் நிம்மதியைக் கெடுக்கவே போகின்றது. அதன் வெளிப்பாடே மகிந்தரின் கலக்கத்திலும் எதிரொலிக்கின்றது.
- கரிகாலன்
Comments