சந்தனக் கடத்தல் வீரப்பனின் செல்லப்பிள்ளையாக இருந்த புதுக்கோட்டை முத்துக்குமார் 'நாம் தமிழர்’ இயக்கத்தில் சேர்ந்து அந்தக் கட்சியின் மாநில ஒருங்கிணைப்பாளராக ஆனார். சீமானின் தளபதியாக வலம்வந்த சுப.முத்துக்குமாரை கடந்த 15-ம் தேதி இரவு, பயங்கரமாக வெட்டிக் கூறுபோட்டுக் கொலை செய்துவிட்டது ஒரு கும்பல். தமிழகத்தைக் குலை நடுங்கவைத்த இந்த சம்பவத்தின் நாயகனான சுப.முத்துக்குமார் யார்?

இந்தக் கேள்விக்கு ஒரு ஃப்ளாஷ் பேக்!

மதுரை பசும்பொன் நகர் ஜீவா தெருவில் சுந்தரம், பார்வதி தம்பதியின் இரண்டாவது மகனாகப் பிறந்தவர் முத்துக்குமார். ஐந்து வயது வரை மதுரையில் வசித்துவந்த குடும்பம், பிறகு பழநிக்குச் சென்றது. அங்கு ப்ளஸ் டூ படிப்பை முடித்த முத்துக்குமார், பிறகு கோயம்புத்தூர் சென்று ஏ.ஸி. மெக்கானிக், டெலிபோன் ஆபரேட்டர் கோர்ஸ் படித்து முடித்த கையோடு வீட்டைவிட்டு வெளியேறி விட்டார். ஆரம்பத்தில், 'என்ன ஏது?’ என கேட்ட பெற்றோரிடம், சரியாக பதில் சொல்லாமல் அவர் போக்கிலேயே போயிருக்கிறார். அந்த நேரம், தமிழீழ தாகம் முத்துக்குமாரை ஆட்படுத்த... இலங்கைக்கே சென்று தலைவர் பிரபாகரனை சந்தித்திருக்கிறார். முத்துக்குமாரின் ஆர்வமும், நடவடிக்கைகளும் பிரபாகர​னுக்குப் பிடித்துப்போக, அவரே இவரை 'தமிழ்த் தேசிய மீட்புப் படை’யின் தலைவராக இயங்குமாறு சொன்னாராம். அதன்படி, தமிழ​கத்துக்கு வந்த முத்துக்குமார், இங்கு இருந்தபடியே விடுதலைப் புலிக​ளுக்குத் தேவையான பொருட்களை வாங்கிக் கொடுத்து இருக்கிறார். அப்போது இவரை சந்தேகப்பட்ட கடற்​கரையோர கிராமவாசிகள், காவல் துறைக்கு தகவல் கொடுக்க... முத்துக்குமார் முதன் முதலில் ஜெயிலுக்குப் போனார்.

அதன் பின், 1997-ல் சந்தனக் கடத்தல் வீரப்பனின் நடவடிக்கைகள் முத்துக்குமாரை ஈர்த்திருக்கிறது. தொடர்புகொள்ளத் துடித்திருக்கிறார். இதைத் தெரிந்துகொண்ட வீரப்பன், தன் இடத்துக்கே முத்துக்​குமாரை அழைத்திருக்கிறார். அங்கு வீரப்பனின் நடவடிக்கைகளுக்கு ஏற்றவாறு நடந்துகொள்ளப் பழகி இருக்கிறார். தனது கூட்டாளிகளையும் அழைத்துச் சென்று வீரப்பனிடம் அறிமுகப்படுத்தி வைத்திருக்கிறார். இந்த நடவடிக்கைகளை மோப்பம் பிடித்த உளவுத் துறை இவர் கூட்டாளிகளை வைத்தே தஞ்சையில் முத்துக்குமாரை மடக்கியது.

ஆனால் அதில் இருந்து தப்பினார். அதற்குப் பின் ஒரு கட்டத்தில், காட்டைவிட்டு வெளியே வந்து, தமிழ்த் தேசிய மீட்புப் படையை செம்மையாக நடத்தி இருக்கிறார். 'இவர் பேச்சை யார் கேட்டாலும் சொக்கிப் போவார்கள்’ எனும் அளவுக்கு வசீகரமாகப் பேசக்கூடியவர் முத்துக்குமார். அவரது பேச்சுத்திறமையில் மயங்கிய சுமார் 100 மாண​வர்களைக்கொண்டு ஓர் இளைஞர் படையை உருவாக்கி வைத்திருந்தாராம் முத்துக்குமார்.

சீமானின் செயல்பாடுகளைப் பார்த்து இவருக்கு ஒரு ஈர்ப்பு வந்தது. உடனே சீமானைச் சந்தித்துப் பேசி, நாம் தமிழர் இயக்கத்தில் இணைந்திருக்கிறார். அதன் பின்பு, அந்த இயக்கத்தைக் கட்சியாக உருவெடுக்க இவரின் பங்கு அதிகம் என்று சொல்கிறார்​கள். இப்படித் தமிழ் உணர்வால் அடிக்கடி மதுரையில் இருந்து புதுக்கோட்டை வந்து போனதில், தி.க-வில் மாவட்டப் பொறுப்பில் இருந்த வடகாட்டைச் சேர்ந்த கரு.காளிமுத்துக்கு பழக்கமாகி, ஒரு கட்டத்தில் அந்தக் குடும்பத்​தின் மாப்பிள்ளையாகவும் ஆகியிருக்​கிறார் முத்துக்குமார். கடந்த ஆண்டு புதுக்கோட்டையில் சீமானே இவர் கல்யாணத்தை நடத்திவைத்து இருக்கிறார்.

கடந்த நாடாளு​மன்றத் தேர்தலில் தற்போதைய உள்துறை அமைச்சரான ப.சிதம்பரத்துக்கு மிகப்பெரிய சவாலாக இருந்த முத்துக்குமார், 200 இளைஞர்​களோடு தொகுதி முழுதும் சூறாவளியாகச் சுழன்று சிதம்பரத்தின் வெற்றியை கேள்விக்குறியாக்கினார். கட்சியின் மேடைப் பேச்சாளர்கள் எதைப் பேச வேண்டும் என்பதை இவர்தான் சொல்வாராம். அந்த அளவுக்கு சீமான் இவருக்கு அதிகாரம் கொடுத்திருந்தார். எட்டு மாவட்டங்களைத் தன்​னுடைய கட்டுப்பாட்டில் வைத்​திருந்த முத்துக்குமாரைத்தான், கொலைவெறிக் கும்பல் போட்டுத் தள்ளியிருக்கிறது.

கடந்த 15-ம் தேதி இரவு எட்டரை மணியளவில் புதுக்கோட்டையில் இருக்கும் வடகாட்டைச் சேர்ந்த வக்கீல் போத்தியப்பனோடு பேசிக் கொண்டிருந்​தார் முத்துக்குமார். பிறகு இருவரும் டூ வீலரில் பழம் வாங்கச் சென்றிருக்கிறார்கள். அப்போதுதான் அந்தச் சம்பவம் நடந்துள்ளது. போத்தியப்பனை மருத்துவமனையில் சந்தித்தோம். அதிர்ச்சி விலகாமல் இருக்கிறார் அவர். ''இரவு ஒன்பதரை மணிக்கு இருவரும் வடகாட்​டுக்குக் கிளம்பினோம். முத்துக்குமார் வண்டியை நான் ஓட்டினேன். புதுக்கோட்டை அண்ணாசிலை பக்கத்தில் வண்டியை நிறுத்திட்டு ஒரு பழக்கடைக்குள் போனோம். அப்போது திடீரென்று இரண்டு பேர் கண் இமைக்கிற நேரத்தில் முத்துக்குமாரை வெட்டி சாய்ச்சிட்டாங்க. சப்தம் போட்ட என் முகத்திலும் வெட்டிட்டு ஓடிட்​டாங்க. கடை வாசலிலும் ஒருத்தன் நின்னுட்டு இருந்​தான். நடந்த சம்பவத்தின் அதிர்ச்சியில வந்தவங்க முகத்​தைக்கூடப் பார்க்க முடியலை...'' என்றார்.

சுமார் 10 மணிக்கு போஸ்ட்மார்ட்டம் முடிந்து முத்துக்​குமாரின் உடலைப் பெற்றுக்கொண்ட கட்சிக்காரர்களும், உறவினர்களும் வடகாட்டுக்கு ஊர்வலமாகவே எடுத்துச் சென்றனர். கரு.காளிமுத்து வீட்டுக்கு விரைந்து வந்து சேர்ந்த சீமான், முத்துக்குமாரின் உடலைப் பார்த்து கதறி அழுதார். அடக்கத்துக்குப் பின் இரங்கல் கூட்டம் நடத்தப்படுவதாக நாம் தமிழர் கட்சியினர் சொல்லி இருந்தனர். ஆனால், 'இந்தச் சூழ்நிலையில் என்னால் பேச முடியவில்லை’ என சீமான் சொல்லிவிட்டதால்... 'படத் திறப்பு அன்று அவர் பேசுவார்’ எனக் கூறிவிட்ட​னர்.

முத்துக்குமாரின் அண்ணன் வீரமணியிடம் பேசினோம். ''எங்க குடும்பத்தில் நான், முத்துக்குமார், முத்துமாரின்னு மூணு பேர். ஆனா, என் தம்பிக்குதான் எங்க அப்பா அம்மா மத்தியில் செல்லம். அதனால், அவன் எங்க போனாலும் அப்பா எதுவும் கேட்க மாட்டாரு... இப்படிப்பட்ட என் தம்பியைக் கொன்னுட்டாங்களே!'' என்று கதறினார்.

கொலைக்கான காரணங்கள் குறித்து பல தரப்புகளில் விசாரித்தோம். ''இரண்டு நாட்களுக்கு முன்பு முத்துக்​குமார் தங்கி இருந்த வடகாடு பகுதியில், 'இவரைத் தெரியுமா?னு போஸ்டர் ஒட்டி அதில், முத்துக்குமார் விடுதலைப் புலிகளுக்கு டீசல் கடத்தி சம்பாதித்தார். வீரப்பனோடு இருக்கும்போது பல கோடிகளை பங்காகப் பெற்றவர். வீரப்பனோடு பழகி ஆயுதம் கடத்தி விற்றவர்’னு சகட்டுமேனிக்கு குற்றம் சுமத்தப்பட்டிருந்தது. இதன் ஹைலைட்டாக, சமீபத்தில் நடந்த முன்னாள் அமைச்சர் வெங்கடாசலம் படுகொலையில் முத்துக்குமாருக்கும் தொடர்பிருக்கும் போலிருக்கிறது. 'முத்தரையர் சமூகமே, இவரை அடை​யாளம் கண்டுகொள்ளுங்கள்’னு டைப் செய்யப்பட்ட நோட்டீஸ்களும் புழங்​கின. இதைப் பார்த்த முத்துக்குமார் அதிர்ச்சியாகி இரண்டு நாட்கள் யாருடனும் பேசலை. இது தொடர்பா நடவடிக்கை எடுக்கச் சொல்லி வடகாடு காவல் நிலையத்தில் கரு.காளி​முத்து புகார் செஞ்சார். அன்னிக்கு ராத்திரியே முத்துக்குமாரை கொலை செஞ்சுட்டாங்க...'' என்றனர். கரு.காளி​முத்துவிடம் பேசினோம். ''ஒரு மாசத்துக்கு முன்னால், 'எச்சரிக்கையா இருங்க’ன்னு யாரோ முத்துக்குமார்கிட்ட சொல்லி இருக்காங்க. என்ன காரணம்னும் தெரியலை. ஆனாலும் தம்பி அசால்ட்டா இருந்திருச்சு. இந்தத் துண்டுப் பிரசுரம் வெளியிட்டதில் எங்க ஊரைச் சேர்ந்த விஜய் ஆனந்த், பாரதி, திருப்பதி மூணு பேருக்கும் தொடர்பு இருக்கும்னுதான் நான் புகார் கொடுத்தேன். காரணம், இவங்களும் தமிழ் உணர்வாளர்கள். கடந்த நாடாளுமன்றத் தேர்தலில் ராஜ கண்ணப்பன்கிட்ட 1 லட்சம் வாங்கிவிட்டு, எந்தச் செலவும் செய்யாம அவங்​களே எடுத்துக்கிட்டாங்க. இப்போ இந்தச் சம்பவம் நடக்குறதுக்கு முன்னால், துண்டுப் பிரசுரம் வெளி வந்துருக்கு. அதுக்குக் காரணம் அவங்க மூணு பேருமாதான் இருக்கணும்னு சொன்னேன். மத்தபடி கொலைக்கும், இவங்களுக்கும் சம்பந்தம் இருக்குற அளவுக்கு எதிர்ப்புக் கிடையாது!'' என்றார்.

நாம் விசாரித்த வரை, 'முத்துக்குமார் விடுதலைப் புலிகளின் தீவிர ஆதரவாளர் என்பதால், அவர்களுக்கு எதிரானவர்கள் இந்தச் செயலைச் செய்திருக்கலாம்’ என்ற கோணத்தில் காவல் துறை விசாரணையை தொடங்கியிருக்கிறது. இதற்கிடையில், கொலையாளிகள் பயன்படுத்திய இண்டிகா கார் காரைக்குடி பக்கத்தில் கோட்டையூர் ரயில்வே கேட் அருகில் நிற்க... காவல் துறை அங்கு விரைந்தது. அந்தக் காருக்குள் ரத்தக்கறையுடன் அரிவாள், சிலுவை போன்றவையும் கிடக்கின்றன.

மாவட்ட எ.ஸ்.பி-யான முத்துசாமி, ''கொலை தொடர்பாக மூன்று பேரைப் பிடித்து விசாரித்து வருகிறோம். ஆறு தனிப்படைகள் விசாரணை துரித கதியில் நடக்கிறது. விரைவிலேயே குற்றவாளிகளைக் கண்டுபிடித்து விடுவோம்...'' என்றார்.

புதுக்கோட்டையில் ரத்தம் காயக்​காய கொலைகள் நடப்பது வழக்க​மானதுதான். ஆனால், முத்துக்குமார் படுகொலை பல்வேறு அதிர்ச்சி அலை​களைக் கிளப்பியுள்ளது!

- வீ.மாணிக்கவாசகம்

படங்கள்: சாய் தர்மராஜ்

• 'நாம் தமிழர் முத்துக்குமார்' கொலையின் பின்னணி என்ன..?
• ‘நாம் தமிழர்’ முத்துக்குமாரின் படுகொலையின் பின்னணியில் கருணாநிதி கூட்டணி

'நாகை மாவட்டம் அக்கரைப்​பேட்டை, கீச்சாங்குப்பம் மற்றும் காரைக்காலில் இருந்து, 18 படகுகளில் 112 மீனவர்கள் கடந்த 12-ம் தேதி கடலுக்குச் சென்றனர். 'எல்லை தாண்டி மீன்பிடித்தார்கள்!’ என்று 15-ம் தேதி மதியம், யாழ்ப்பாணம் பருத்தித்துறை கடற்பரப்பில் அவர்கள் பிடிக்கப்பட்டு, 16-ம் தேதி மாலை பருத்தித்துறை நீதிமன்றத்தில் ஆஜர்படுத்தப்பட்டு, 15 நாள் காவலில் வைக்கப்பட்டனர்!’ என்று செய்தி வெளியானது.

அடுத்து, 'நாகை மீனவர்களை, ஈழத்து மீனவர்கள்தான் சுற்றிவளைத்துப் பிடித்து, உள்ளூர் போலீஸிடம் ஒப்படைத்தார்கள்..!’ என்று இலங்கைத் தரப்பில் செய்தி வந்தது. எப்போதும் இல்லாதவகையில், 'நாகை மீனவர்களை விடுதலை செய்ய வலி​யுறுத்தி இலங்கைத் துணை தூதரகம் முன்பு ஆர்ப்பாட்டம்!’ என தி.மு.க. தலைமைக் கழகம் அறிவிப்பு வெளி​யிட்டது. கனிமொழி முதலான சில தலைவர்கள் ஆர்ப்பாட்டம் நடத்தி கைதாகி விடுதலை ஆனார்கள். ஆனால், வழக்கமாக குரல் எழுப்பும், இன உணர்வு அமைப்புகளின் தலைவர்கள் யாருமே வாய்திறக்கவில்லை!

உண்மையில் நடந்தது என்ன?

இலங்கை வடமராட்சி வடக்குக் கடல் தொழிலாளர் கூட்டுறவுச் சங்கங்களின் சமாஜத் தலைவர் அந்தோணிப்​பிள்ளை எமிலியாம் பிள்ளையிடம் பேசினோம். ''சம்பவத்​தன்று, எங்கட ஆட்கள் முதல் நாள் கடலில் போட்ட வலைகளை எடுக்கப் போக... இந்திய இழுவைப் படகுகளால் வலைகள் நாசமாகிக் கிடந்திருக்கு. எங்கட ஆட்கள் கோபத்தில் பேச, இரு தரப்பிலயும் வாக்குவாதம்! தமிழக இழுவைப் படகுகளைக் கரைக்குக் கொண்டு வந்தோம். 30 வருடங்களா போரால் துன்பத்தை அனுபவிச்​ சுட்டு, இப்போதான் ஆழ்கடலில மீன்பிடிக்க அனுமதி கிடைச்சுது. போரில் குடும்ப உறவுகளை இழந்து, சொத்துகளை வித்தோ... கடன் வாங்கியோதான் மீன்பிடி சாதனங்களை வாங்கியிருக்கோம். இந்த நேரத்தில இழுவைப் படகைக் கொண்டுவந்து, எங்கட மீன்பிடி சாதனங்களை அழிக்கலாமா? வலை போட்டுப் பிடிச்சா, மேற்பரப்பில உள்ள மீன்களைப் பிடிக்கலாம், அடியில மீன்குஞ்சுகள் இருக்கும். தொடர்ந்து மீன்வளம் அழிக்கப்படாமல் இருக்கும். தமிழகத்தில் இருந்து வர்ற சகோதரர்களை எங்க கடற்பிரதேசத்தில மீன்பிடிக்கக் கூடாதுன்னு சொல்லல. எங்களப் போலவே வலையைப் போட்டு மீன்பிடிங்க. நீங்க இழுவைப் படகைப் பயன்படுத்துறதால எங்கட இயற்கை அழிஞ்சதுன்னா, இந்தத் தொழிலையே நம்பியிருக்கிற நாங்க எங்க அய்யா போக?' என்று கேட்டார் எமிலியாம்பிள்ளை.

''ஈழத் தமிழ் மீனவர்களின் இந்தக் குரலின் நியாயத்தை, தமிழக மீனவர்கள் தரப்பில் யாரும் மறுக்கவில்லை. இரு தரப்பு அரசாங்கங்களும் உயர்மட்ட அளவில் கறாராகப் பேசி, இதில் முடிவுகாண வேண்டும்!'' என்கிறார்கள், தமிழக மீனவர் சங்கங்களின் தலைவர்கள். இதையட்டி சொல்லப்படும் இன்னொரு கருத்துதான் முக்கியமானது. 'தமிழக மீனவர்களின் அத்துமீறலே பருத்தித்துறை சிறைப்பிடிப்புக்குக் காரணம் என்பது உண்மை அல்ல; சிங்கள ராஜபக்ஷே அரசின் சகுனித் திட்டம்தான் இது!’ என்கிறார்கள்.

நாம் விசாரணையில் இறங்கியபோது, ''தமிழக மீனவர்​களை சிங்களக் கடற்படை படுகொலை செய்வதும், தாக்கிக் கொள்ளையடிப்பதும் ராஜபக்ஷே அரசின் மீதான இனப்படுகொலைக் குற்றச்சாட்டோடு சேர்க்கப்பட்டு, பெரிய பிரச்னையாக உருவெடுத்துள்ளது. இதில் உடனடியாகத் தப்பிக்கவேண்டிய கட்டாயத்துக்கு ராஜபக்ஷே தள்ளப்பட்டு உள்ளார். இதனால்தான் சமீபமாக தமிழக மீனவர் படுகொலை செய்யப்பட்டபோதெல்லாம், 'யாரோ மூன்றாவது சக்தியின் கைவரிசை’ என்று இலங்கை அரசுத் தரப்பில் மறுப்பு வெளியிடப்படுகிறது. 'தங்கள் மீது தவறு இல்லை என மட்டும் சொன்னால் போதாது, தமிழக மீனவர்கள்தான் தவறுக்குக் காரணம்!’ என்று நிரூபித்துக் காட்டவும் முடிவுசெய்தனர். அதன்படி, கடந்த செவ்வாயன்று யாழ்ப்பாணம் பருத்தித்துறை கடற்பரப்பில் மீன்பிடியில் இருந்த தமிழக மீனவர்களின் 18 படகுகளை, சிங்களக் கடற்படையின் அதிவேக டோரா தாக்குதல் படகுகள் சுற்றிவளைத்தன. மேலும் கடற்படையினர், கரையில் உள்ள மீனவர்களை வரவழைத்து அவர்களே தமிழக மீனவர்களைப் பிடித்ததாகக் கூறுமாறு கட்டாயப்படுத்தினர். அவர்களும் அப்படி​யே கூறுகின்றனர். இதன் மூலம் தமிழக மீனவர்கள் எல்லை தாண்டி மீன்பிடிக்கிறார்கள் என்று ஈழத்தமிழரை வைத்தே சொல்லவைக்கும் திட்டத்தில் வெற்றி பெற்றுள்ளனர். ஈழத்தமிழ் மீனவர்களின் தொழிலைப் பாதுகாக்க வேண்டும் என்ற அக்கறை ராஜபக்ஷேவுக்கு இருப்பதாகக் காட்டிக்கொள்வது எல்லாம் பொய். தமிழக இழுவைப் படகுகளால் ஈழ மீன்வளத்துக்கு பாதிப்பு என்பதற்காகவும் அவர்கள் நடவடிக்கையில் இறங்கவில்லை. ஏனென்றால், யாழ்ப்பாணத்தில் செல்வாக்குள்ள ஒரு அரசியல்வாதி தடைவிதிக்கப்பட்ட இழுவைப்படகு மூலம் அரசு ஆதரவுடனேயே அங்கு மீன்பிடித் தொழிலைப் பெரிய அளவில் செய்ய முயன்றார். பல தரப்பினரும் எதிர்த்ததால் தற்காலிகமாக நிறுத்தி வைத்துள்ளார். எனவே, பருத்தித்துறை சம்பவம் என்பது முழுக்க முழுக்க ராஜபக்ஷே தரப்பு திட்டமிட்டு நடத்திய நாடகம்!' என்றனர் நம்மிடம்.

இன்னொரு புறம், ''ஒரு முறை தமிழகத்தின் தூத்துக்குடி மாவட்டத்தில் கடல் தாண்டி கிராமத்துக்குள் வந்து துப்பாக்கிச் சூடு நடத்திவிட்டுப் போனவர்கள்தான், சிங்களக் கடற்படையினர். இந்தியக் கடல் பகுதியில் புகுந்து நாகை, புதுக்கோட்டை, ராமநாதபுரம் மாவட்ட மீனவர்களை சுட்டுக் கொன்றவர்கள். அவர்களின் ஊருக்கு அருகில் தமிழக மீனவர்கள் போகும்போது, சும்மா பிடித்துக்கொண்டுபோய் நீதிமன்றத்தில் நிறுத்துவார்களா? பருத்தித்துறை பிடித்துவைப்பு நாடகத்தின் மூலம் சிலர் இனத்துரோகக் கறையை எளிதாகத் துடைக்க முயல்கிறார்கள். அது நடக்காது!' என்கிறார்கள், தமிழ் இன உணர்வாளர்கள்.

என்னதான் நடந்தது என்றாலும், இனிமேலும் இப்படி நடக்காமல் இருக்கட்டுமே!

- இரா.தமிழ்க்கனல்

அஹிம்சா மூர்த்தியான மகாத்மாவை​யும், ஆயுதம் தாங்கிய ;பிரபாகர​னையும் கதாபாத்திரங்​களாகச் சித்திரித்து 'முதல்வர் மகாத்மா’ என்கிற திரைப்படத்தை இயக்குநர் பாலகிருஷ்ணன் எடுத்து முடிக்க... இந்தப் படத்துக்கு மட்டும் தடை வராமல் இருக்குமா என்ன? இயக்குநரிடமே பேசினோம். ஏற்கெனவே 'காமராஜ்’ படத்தை எடுத்தவர் இவர்!

''மகாத்மா காந்தி மீண்டும் பிறந்து வந்தால் என்ன நடக்கும்? என்பதுதான் படத்தின் கரு! வசதிமிக்க திவான் குடும்பத்தில் பிறந்திருந்தாலும்கூட கோவணம் கட்டி அஹிம்சை பேசியவர் காந்தி. ஆனால், இன்றைய அரசியல்? பிறந்த நாளைக்கு 500 கோடியில் மாலை போடுவது, நாடெல்லாம் சிலைவைப்பது என முதல்வர் மாயாவதியின் உ.பி. அரசியலையும் படத்தில் காட்சிகளாக வைத்தேன். 'இது நீதிமன்றத்தில் இருக்கும் பிரச்னை. இந்தக் காட்சிகள் வரக் கூடாது!’ என்றனர்.

அஹிம்சாவாதியாக இருந்த மகாத்மாவும், இன்னொரு துருவமாக இருக்கும் விடுதலைப் புலிகள் தலைவர் பிரபாகரனும் நேருக்கு நேர் சந்தித்துப் பேசுவதுபோல் காட்சி வருகிறது. 'இது தடை செய்யப்பட்ட இயக்கம்...’ என்று கண்டிப்புக் காட்டினர். உடனே, 'நடப்புச் சம்பவங்களை வரிசையாகக் கோத்து திரைக்​கதை அமைக்கப்பட்ட படத்தில், உலகறிய நடக்கிற ஈழப் போராட்​டப் பகுதியை மட்டும் எப்படிச் சொல்லாமல் விட முடியும்? அதுவும் அல்லாமல், தடை செய்யப்பட்ட இயக்கத்துக்கு ஆதரவான வசனங்களை நான் படத்தில் சேர்த்திருந்தால்தானே நீங்கள் தடை செய்ய வேண்டும்? எந்த இடத்திலும் அப்படி ஒரு வார்த்தையைக்கூட நான் சேர்க்கவில்லையே’ என்று தெளிவாகச் சொன்னேன்.

ஆனாலும், 'இந்தக் காட்சிகளை அனுமதிக்க எங்களுக்கு அதிகாரம் இல்லை’ என்று சொல்லி படத்தை அட்வைஸரி கமிட்டிக்கு அனுப்பினர். செக்ஸ், வன்முறை என்று எதையுமே வலிந்து திணித்தால்தான், அதை சென்சார் போர்டு ஆட்சேபிக்கும். ஆனால், 'முதல்வர் மகாத்மா’ படத்தின் கதையோடு கூடிய இந்தக் காட்சியின் நியாயத்தைப் புரிந்துகொண்ட அட்வைஸரி கமிட்டி, படத்துக்கு எந்தவித மறுப்பும் இன்றி தணிக்கைச் சான்றிதழ் கொடுத்துவிட்டது. விரைவில் வெள்ளித் திரைக்கு வருகிறார் 'முதல்வர் மகாத்மா’!'' - போராடி ஜெயித்த உற்சாகத்​தோடு சொன்னார் பால​கிருஷ்ணன்!

காந்தியும் பிரபாகரனும் என்ன பேசுகிறார்கள் என்பதைத் திரையில் பார்ப்போம்!

- த.கதிரவன்

''எங்கள் 'மா தந்தை’ வேலுப்பிள்ளை இறந்து ஓராண்டுதான் ஆகிறது. இதோ, 'மா தாயார்’ பார்வதியும் போய்விட்டா​ரே!'' என உலகம் முழுதும் துயரத்தைப் பகிர்ந்து​கொள்​கிறார்கள் தமிழ் இன உணர்​வாளர்கள்!

தமிழ் ஈழ விடுதலைப் புலிகள் இயக்கத்தின் தலைவர் பிரபாகரனின் தாயார் பார்வதி அம்மாள், கடந்த 20-ம் தேதி இயற்கை அடைந்துவிட்டார். 80 வயதான அவர், கடைசி காலத்தில் பட்டபாடு

கொஞ்ச​நஞ்சம் அல்ல. மருத்துவ சிகிச்சைக்காகக் கடந்த ஆண்டு மார்ச் 2-ம் தேதி, மலேசியாவுக்கு அனுப்பப்​பட்டார். கனடாவில் வசிக்கும் மகள் வினோதினி, உடன் இருந்து தாயைக் கவனித்துக்​கொண்டார். பிறகு, மலேசியாவில் உள்ள இந்தியத் தூதரகத்தில் முறையாக விசா பெற்று, சிகிச்சைக்காக தமிழ்​நாட்டுக்​குக் கொண்டுவரப்பட்டார். ஆனால், அவரை விமானத்தைவிட்டு இறங்கவிடாமல், கடந்த ஏப்ரல் 16-ம் தேதி இரவு, பல மணி நேரம் விமானத்​திலேயே வைத்திருந்தார்கள். மறுநாள் விடியும் வேளை, அவரை அப்படியே திருப்பி​விட்டனர். மலேசியாவில் தொடர்ந்து தங்க முடியாமல், வேறு வழியின்றி இலங்கைக்கே திரும்பி அழைத்துச் செல்லப்பட்டார்.

மறைந்த மூத்த வழக்கறிஞர் கருப்பன் இதை நீதிமன்றத்துக்கு எடுத்துப்போக... இறங்கி வந்தன மத்திய, மாநில அரசுகள். ஆனாலும், ''பார்வதி அம்மாள் தமிழகத்தில் சிகிச்சைக்கு வரலாம். மகள் வீட்டில் தங்கலாம். உறவினர்களைத் தவிர எந்த அரசியல் அமைப்பினரும் அவரைச் சந்திக்கக் கூடாது!'' என நிபந்தனை போட்டது.

'ஒரு கைதியைப்போல அம்மாவுக்கு மருத்துவச் சிகிச்சையா?’ என மான உணர்வு பொங்க மறுத்துவிட்டனர் பிரபாகரனின் உடன்பிறந்தவர்கள். அதனால், பிரபாகரனின் சொந்த ஊர்க்காரரான யாழ்ப்பாண முன்னாள் எம்.பி-யான சிவாஜிலிங்கம், பார்வதி அம்மாளின் பராமரிப்புப் பொறுப்பை ஏற்றுக்கொண்டார்.

ஒன்றரை ஆண்டுகளாக சொந்த ஊரான வல்வெட்டித்​துறை மாவட்ட மருத்துவமனையில், டாக்டர் மயிலேறும் பெருமாள் ஒரு குழந்தையைக் கவனிப்பதுபோல பார்வதி அம்மாளைக் கவனித்தார்.

அவ்வப்போது டென்மார்க்கில் இருந்து மூத்த மகன் மனோகரனும், இரண்டு நாளுக்கு ஒரு முறை கனடாவில் இருந்து மகள் வினோதினியும் அம்மாவிடம் தொலை​பேசியில் பேசுவார்கள். எத்தனை முறை தொலைபேசியில் பேசினாலும், பிள்ளைகளை நேரில் பார்க்க முடியாமல் துடித்தார் அந்தத் தாய். இந்தக் கவலையால் அவரின் மனதும் உடம்பும் இயங்க மறுத்தன.

படுக்கையிலேயே காலம் தள்ளும் கஷ்டத்தில், படுக்கைப் புண்ணும் வந்து சேர, தலையில் கட்டுப் போடப்​பட்டது. புண் ஆறியும், சில வாரங்களாக அவருக்கு குழாய் மூலமே திரவ உணவு செலுத்தப்பட்டது. கடந்த வாரத்தின் கடைசியில் அவரது உடல், இறுதி ஓய்வுக்கு முந்தைய அமைதிக்கு வந்தது. கடந்த 18, 19 தேதிகளில் உறக்க நிலையிலேயே இருந்தார். 20-ம் தேதி காலை 6.20 மணிக்கு வழக்க​மான பரிசோதனைக்குச் சென்றபோது, அவர் இறந்திருந்ததை டாக்டர் மயிலேறும் பெருமாள் அறிந்தார். 'அம்மா’வைப் பராமரிக்கும் அந்த மருத்துவருக்கே ரத்த அழுத்தம் 200-க்கும் மேல் எகிற... அவரே அவசர சிகிச்சை எடுக்க​​வேண்டிய நிலையிலும், நாம் தொடர்பு​கொண்டவுடன், விவரங்​களைச் சொன்னார்.

''ஞாயிறு காலை தாதிமார், 'அம்மாவுக்குப் பேச்சுமூச்சேஇல்லை’ என என்னிடம் ஓடி வந்தார். பரிசோ​தித்த​​போது பார்வதிஅம்மாள் உயிர்பிரிந்திருந்தது. இது இயற்​கை மரணம்தான். இருந்தும், இதை ஓர் ஆண்டோ, இரண்டு ஆண்டு​களோ தள்ளிப்​போட்டிருக்​கலாம். சொந்த ஊரில் சொந்தங்​கள் சூழ இருந்த​போதும், புத்திரசோகத்​தால்தான் அவர் இறந்துவிட்டார்!'' என்றார் டாக்டர்.

முன்னாள் எம்.பி-யான சிவாஜி​லிங்கம், ''இறப்புக்கு இரண்டு நாள்களுக்கு முன்பு அம்மாவைப் பார்த்துவிட்டு வந்தேன். என் பெயரைச் சொல்லி 'வந்திருக்கிறேன்’ என்றதும் அழுதார். வேறு வேலைகளால் மறுநாள் அங்கு செல்ல வெகுநேரம் ஆகிவிட்டது. மருத்துவமனைக்குச் சென்றும் அம்மா தூங்கிவிட்டதால் திரும்பிவிட்டேன். காலையில் அவர் இறப்புச் செய்தியைக் கேட்டதும் என்னால் தாங்க முடியவில்லை...'' என்றார் சோகத்துடன்.

பார்வதி அம்மாளின் மரணச் செய்தி தெரிந்ததும் சிங்களப் போலீஸாரும், ராணுவத்தினரும் ஏராளமாக அங்கு குவிக்கப்பட்டனர். அவர்களின் வருகை, அஞ்சலி செலுத்த வந்த மக்களை அச்சுறுத்தியது. ஞாயிறு மாலை தீருவில் மைதானத்துக்கு எடுத்துச் செல்லப்பட்ட பார்வதி அம்மாளின் உடல், பொது மக்களின் அஞ்சலிக்காக வைக்கப்பட்டது. அங்கும் சிங்களப் படை​யின் அட்டகாசம்... மருத்துவமனையின் முன்பு சீரு​டையில் இருந்தவர்கள், தீருவில் மைதானத்தில் சாதா உடையில் சுற்றித் திரிந்தார்கள். அடக்க முடியாத மனவெழுச்சியில் சிக்கிய மக்கள், கூட்டம் கூட்டமாக வந்து அஞ்சலி செலுத்த முடியாதபடி அதிக கெடு​பிடிகள்... கடைசியில் திங்கள்கிழமை வரை ஒருவர் ஒருவராகத்தான் அஞ்சலி செலுத்தினர். பிரபாகரனைப் பெற்றெடுத்த காரணத்தால், சொந்த மக்களின் அஞ்சலியைக்கூட பெற்றுக்கொள்ள முடியாதபடி இன வெறிக் கொடுமைக்கு ஆளானது பார்வதி அம்மாளின் சடலமும்!

பார்வதி அம்மாள் கேட்ட ஒரு கேள்வி மட்டும் இன்னும் தொக்கி நிற்கிறது. ''கலைஞர் அய்யா, ஏன் என்னைத் திருப்பி அனுப்பினார்?'' - பார்வதி அம்மாளின் இந்தக் கேள்வி மட்டும் உரிய விடை தேடி உலுக்கிக்கொண்டே அலைகிறது... உயிரோடு!

- இரா.தமிழ்க்கனல்